ڕاگەیاندنی خولی سوپەری ئەوروپی لە نێوەندە وەرزشییە جیهانییەکان سەدایەکی بەهێزیدایەوە، بەهۆیەوە سەرۆکی یانەی ڕیاڵ مەدرید کە لەهەمان کاتدا سەرۆکی دەستەی دامەزرێنەری خولەکەیە، خرایە بەر لێشاوی ڕەخنەی میدیا و کەسایەتی وەرزشیی و سیاسییەکان.
بیرۆکەکە بریتیبوو لە جیابوونەوەی 12 یانە گەورەی خولەکانی ئینگلتەرا و ئیسپانیا و ئیتاڵیا و سازکردنی خولێک بە بەشداریکردنی سەرجەمیان، لە ڕێگەی ئەم خولەوە داهاتێکی خەیاڵییان بەدەستدەهێنا، بەڵام فیدراسیۆنەکانی تۆپی پێی ئەوروپا و جیهان شکستیان بە بیرۆکەکە هێنا، هەروەها فلۆرنتینۆ پێرێزی سەرۆکی یانەی ڕیاڵ مەدریدیان تۆمەتبارکرد بە هاندانی یانەکانی دیکە و داڕشتنی بیرۆکەکە.
ماڵپەڕی گۆڵی نێودەوڵەتی ئاشکرایکردووە، کە کەسی پشت بیرۆکەی سوپەری ئەوروپی هەرگیز فلۆرنتینۆ پێرێزی سەرۆکی ڕیاڵ نییە، بەڵکو جوسێپ ماریا بارتۆمیوی سەرۆکی پێشووی یانەی بەرشلۆنە بووە.
بارتۆمیو لە ساڵی 2016 بۆ دەربازکردنی یانەکەی خۆیی و یانەکانی دیکە لە قەیرانی دارایی، ستراتیج و پلانی بۆ خولی سوپەری ئەوروپی داڕشتووە و فلۆرنتینۆ پێرێزی سەرۆکی ڕیاڵی وەک یەکەمین کەسایەتیەکان ئاگادارکردووەتەوە، بەڵام دوای ئەوەی بارتۆمیو لە پۆستەکەی لابراوە، داوای لە ستافی لاپۆرتا کردووە لەسەر بیرۆکەکە بەردەوامبن.
بەپێی سەرچاوەکە، بەهۆی ئەزموون و گەورەیی ناوی ڕیاڵەوە سەرەتا دامەزرێنەران پێرێزیان وەک سەرۆکی دەستەی دامەزرێنەران دەستنیشانکردووە، بەڵام بڕیاربووە دوای سەرکەوتنی پڕۆژەکە بارتۆمیو وەک سەرۆک دەستنیشانبکرێت.
