لە پەیوەندییەكی تەلەفۆنیدا، كازمی و ماكرۆن پەیوەندییە “ئابوری و سیاسی و هونەری”یەكانی نێوان هەردوولایان تاووتوێكرد.
ئەمڕۆ شەممە 3ی نیسان، ئیمانوێل ماكرۆن، سەرۆك فەڕەنسا پەیوەندییەكی تەلەفۆنی لەگەڵ مستەفا كازمی، سەرۆكوەزیرانی عێراق ئەنجامداوە، وەك نوسینگەی كازمی ئاشكرایكردووە.
لەو پەیوەندییەدا، بەگشتیی باس لە بارودۆخە هەرێمی و جیهانییەكان كراوە، هەروەها ڕێگاكانی هەماهەنگییەكان بۆ هێوركردنەوە و سەقامگیركردنی ناوچەكە تەوەرێكی پەیوەندییەكە بووە.
مستەفا كازمی ئاماژەی بەوەكردووە، عێراق پەیوەندییەكی هەماهەنگی و هاوسەنگی لەگەڵ هەموو هاوبەشە نێودەوڵەتییەكانی دەوێت.
لای خۆشییەوە، سەرۆكی فەڕەنسا دەستخۆشی لە هەڵوێستەكانی عێراق و سەرۆكی ئەنجومەنی وەزیرانی وڵاتەكە كردووە.
جەختی لەوەشكردووەتەوە، وڵاتەكەی پشتگیریی تەواو لە عێراق دەكات و خوازیاری فراوانكردنی هەماهەنگییەكانی نێوان هەردوولایە بەتایبەت بە بواری ئابوری و ئاشكراشیكردووە، “كۆمپانیا فەڕەنسییەكان خوازیاری وەبەرهێنانن لە عێراق لە سەرجەم كەرتەكاندا”.
