کەناڵی 12ی ئیسرائیلی تۆمەتی پێکانی کەشتییەکی بازرگانی وڵاتەکەی خستووەتە پاڵ ئێران و ڕایدەگەیەنێت، “کەشتییەکە لە دەریای عومان بە موشەکی ئێرانی کراوەتە ئامانج”.
کەناڵە ئیسرائیلییەکە بڵاویکردووەتەوە، “ئەمڕۆ پێنجشەممە 25ی ئازار، کاتێک کەشتییەکی ئیسرائیلی سەرقاڵی گواستنەوەی کاڵای بازرگانی بووە بۆ بەندەرەکانی وڵاتی تەنزانیا لە ئاوەکانی نێوان عوممان و ئێران بە موشەک هێرشکراوەتەسەری ئەگەرچی هێرشەکە نەبووەتە هۆی وەستاندنی کەشتییەکە”.
بەپێی زانیارییەکانی میدیا ئیسرائیلییەکان خاوەنی کەشتییەکە کۆمپانیایەکی ئیسرائیلییە و نوسینگەی سەرەکی لە بەندەری حەیفایە و کاری بازرگانی دەکات.
ئاژانسی ڕۆیتەرز بڵاویکردووەتەوە تا ئێستا بە تەواوی دڵنیایی نەدراوە کە هێرشەکە ئێران ئەنجامی دابێت، لەگەڵ ئەوەش کەشتییەکە بەردەوامی داوە بە گەشتەکەی و بەرەو وڵاتی تەنزانیا بەڕێکەوتووە.
