كازمی دەزگا ئەمنییەكانی ڕاسپاردووە، ڕێگری لە گرانكردنی نرخی خۆراك بكەن لەلایەن بازرگانانەوە.
ئەمڕۆ دووشەممە 22ی ئازار، سەرچاوەیەكی حكومی بە ئاژانسی هەواڵی عێراقی ڕاگەیاندووە، “زۆربەی ئەو مەوادە خۆراكییانەی كە نرخەكانیان بەرزكراونەتەوە لەناوخۆی عێراق بەرهەمدەهێندرێن و پەیوەندییان بە نرخی دۆلارەوە نییە”.
ئەوەشی وتووە، “هەندێك لە بازرگانان هاوڵاتییانیان لە خشتە بردووە و نرخیان بەرزكردووەتەوە”.
بەگوێرەی ئەو زانیارییانەی ئەو سەرچاوە حكومییە ئاشكرایكردوون، “مستەفا كازمی، فەرماندەی گشتیی هێزە چەكدارەكانی عێراق دەزگا ئەمنییەكانی ڕاسپاردووە ڕێگری بكەن لەوەی بازرگانان نرخ بەرز بكەنەوە”.
كازمی داواشی لە وەزارەتی بازرگانیی عێراق كردووە، هەموو هەوڵێك بخەنەگەڕ و باری لەناكاو ڕابگەیەنن و بەدرێژایی كات كار بكەن بۆ دابینكردنی ئەو خۆراكانەی لەڕێی كۆبۆنەوە بەسەر هاوڵاتییاندا دابەش دەكرێت”.
