سەرۆکی حکومەتی هەرێم ڕایگەیاند، ئەوان باش دەزانن کە کێ لە پشتی هێرشەکانی سەر هەولێرەوەیە و ئەو کەس و گروپانەیان دەستنیشان کردووە.
مەسرور بارزانی، سەرۆکی حکومەتی هەرێم لە چاوپێکەوتنێکدا لەگەڵ کەناڵی FRANCE 24 ڕایگەیاند، “هێرشەکانی سەر هەولێر هەوڵێكی تیرۆرستی بوون و لێکۆڵینەوەکان لەسەر ئەم پرسە بەردەوامە و ئێمەش چاوەڕێی ئەنجامی لێکۆڵینەوەکان دەکەین”.
سەرۆکی حکومەتی هەرێم لەبارەی چالاکییەکانی داعشەوە ڕایگەیاند، “لەم کاتەدا کە ئێمە قسەدەکەین داعش سەرقاڵی خۆڕێکخستنەوەیە، بەهۆی ئەو بۆشاییە ئەمنییەش لە نێوان سوپای عێراق و پێشمەرگەدایە داعش زیاتر خۆی ڕێکدەخاتەوە”.
لەبارەی پێکدادانەکانی نێوان پارتی کرێکارانی کوردستان و تورکیا لە خاکی هەرێمدا مەسرور بارزانی وتی، “هۆکاری ئاڵۆزییەکانی سەر سنور پەکەکەیە و بوونی پەکەکە وایکردووە سنورەکان ئارامی بەخۆیانەوە نەبینن، لەبارەی سنورەکانی ڕۆژئاوای کوردستانیش هیودارین چارەسەرێکی هەمیشەیی بۆ بدۆزرێتەوە”.
لەسەر سەردانەکەی پاپا بۆ هەرێمی کوردستان، مەسرور بارزانی ئاماژەی بەوەکرد، “سەردانی پاپا بۆ هەرێم تەنها بۆلای مەسحییەکان نییە، بەڵکو هیوادارین سەردانەکە ببێتە هۆی پشتگیری نێودەوڵەتی بۆ ئەو ئاوارانەی لەناو خاکی هەرێمدا دەژین”.
