وەزارەتی دارایی عێراق چاوی لەوەیە پەرلەمان پرۆژەیاسا نوێیەكەی قەرزكردن پەسەند بكات بۆ ئەوەی موچەی مانگی ئەیلول-ی فەرمانبەرانی پێ دابین بكرێت، سەرچاوەیەكیش لە وەزارەتی دارایی ئاشكرایدەكات، تا دوای ناوەڕاستی ئەم مانگە موچە دابەش ناكرێت.
ئەو سەرچاوەیە ئەوەشی ئاشكراكردووە، ئەگەر پرۆژەیاسا نوێیەكەی قەرزكردن پەسەند نەكرێت ئەوا وەزارەتی دارایی عێراق ناتوانێت موچەی مانگی ئەیلول-ی فەرمانبەران خەرج بكات، ئەوەشی خستەڕوو، “بە دڵنیاییەوە دابەشكردنی موچەی فەرمانبەرانی عێراق تا دوای ناوەڕاستی ئەم مانگە دابەش ناكرێت، كە كۆتایی چلەی ئیمام حسێن و دەستپێكردنەوەی دانیشتنەكانی پەرلەمانە”.
وەزارەتی دارایی چاوەڕوانە لەگەڵ دەستپێكردنەوەی دانیشتنەكانی پەرلەمان، كاری یەكەمی ئەو ئەنجومەنە تاووتوێكردنی پرۆژەیاسا نوێیەكەی قەرز بێت كە لەلایەن حكومەتەوە ئاڕاستەی كراوە.
ئەوە لەكاتێكدایە لیژنەی دارایی ئەنجومەنی نوێنەرانی عێراق یەكشەممە 4ی تشرینی یەكەم لە بەیاننامەیەكدا ڕایگەیاند، وەزارەتی دارایی پڕۆژەیەكی تری بۆ قەرزكردن پێشكەشكردووە وەك ئەوەی ئیشی وەزارەتەكە تەنها قەرزكردن بێت و ئەوەشی خستەڕوو، “پرسی موچە لە ئەستۆی پەرلەمان نییە و لە ئەركەكانی حكومەتە”.
