وەزارەتی ئاسایشی ئێران دەڵێت، “كردەیەكی تیرۆریستیمان لە كوردستانی عێراق پووچەڵكردەوە و دوو تیرۆریستمان كوشت.”
دەستەی پەیوەندییە گشتییەكانی وەزارەتی ئاسایشی ئێران ئەمڕۆ چوارشەممە 24ی شوبات ڕایگەیاند، “ئۆپەراسیۆنێكیان بە هاوكاریی ئاسایشی پارێزگای ئازەربایجانی خۆرئاوا و قەرارگای حەمزە سەید شوهەدا ئەنجامداوە، چالاكییەكی چەكداریی تیمێكی تیرۆریستییان ئاشكراكردووە و پووچەڵكردووەتەوە.”
وتیشی، “لە ئۆپەراسیۆنەكەدا هەردوو ئەندامی تیمە تیرۆریستییەكەیان كوشتووە كە سەر بە گرووپێكی تیرۆریستی بوون كە هەرێمی كوردستانیان كردووە بە پێگەی خۆیان.”
وەزارەتی ئاسایشی ئێران لە ڕاگەیەندراوێكدا باس لەوە دەكات كە “ئەو دوو تیرۆریستە بەنیازبوون كردەوەی تیرۆریستی لە قەزای پیرانشار ئەنجامبدەن، دوای كوژرانیان دەستگیراوە بەسەر دوو چەكی كڵاشینكۆف و بۆمبێكی دەستی و بڕێك تەقەمەنیدا.”
ئەمڕۆ كاربەدەستێكی ئێران لەبارەی كوژرانی قاسم سلێمانی لە عێراق وتی، “ئەو هێرشە تیرۆرێكی نێودەوڵەتی و پێشێلكردنی سەروەریی وڵاتێك بوو.”
