13 ئەندام و كاربەدەستی داعش لە بەغداد دەستگیركران.
كەمێك لەمەوبەر، ئاژانسی هەواڵگری و لێكۆڵینەوەی فیدراڵیی عێراق ئاشكرایكرد، “13 ئەندامی داعش لە چەند ناوچەیەكی جیاوازی بەغداد دەستگیركراون.”
لە ڕاگەیەندراوێكدا ئاژانسەكە ڕایگەیاند، “لەڕێگەی كاری هەواڵگری و كۆكردنەوەی زانیاری و هاوكاریی نێوان بەڕێوبەرایەتییەكانمان، 13 داعشمان دەستگیركرد كە بەپێی مادەی 4ی تیرۆر لەلایەن دادگاوە داواكراوبوون و بڕیاری دەستگیركردنیان دەركرابوو.”
ئاژانسی هەواڵگری و لێكۆڵینەوەی فیدراڵی دەڵێت، “ئەو تۆمەتبارانە لەچوارچێوەی باندە تاوانكارەكانی بەناو كەرتەكانی كەركوك و نەینەوا و باكووری بەغداد و دیجلەدا كاریاندەكرد. هەمووشیان دانیان بە تاوانەكانیاندا ناوە و ڕادەستی دادگا دەكرێن.”
وەك ڕاگەیەندراوی ئاژانسەكە باسی كردووە، ئەو داعشانە لەژێر ناو و نازساوی جیاوازدا كاریانكردووە و ئەركەكانیان جۆراوجۆر بوون.
