قوباد تاڵەبانی، جێگری سەرۆکوەزیران ڕایدەگەیەنیت، بافڵ جەلال تاڵەبانی، سەرۆکی یەکێتیی نیشتمانیی کوردستان کاردەکات بۆ ئەوەی متمانە لەنێوان لایەنەکان دروستببێتەوە.
قوباد تاڵەبانی، لە دووەمین کۆڕبەندی ئابوریی دێڵفی لە سلێمانی ڕایگەیاند، سلێمانی هەمیشە لە بوارە جیاوازەكاندا ڕۆڵی گرنگی لە ناوچەكەدا هەبووە و هەمیشە وەک ناوەندێک هەوڵیداوە ڕۆڵی نێوەندگیر بگێڕێت بۆ چارەسەرکردنی کێشەکان.
وتیشی، تێچووی ململانێ بەردەوامەکانی ناوچەکە زۆرە و کاتی ئەوە هاتووە دەرفەتێکی ڕاستەقینە بە ئاشتی بدەین.
ئاماژەی بەوەشدا، کارکردنی پێکەوەیی هەولێر و بەغداد سوودی گەورەی بۆ هەموو عێراق و هەرێمی کوردستان دەبێت، چونکە سەرکەوتنی هەر لایەکیان بە سەرکەوتنی ئەوی دیکە ئەژماردەکرێت.
تیشکیشی خستە سەر هەوڵەکانی بافڵ جەلال تاڵەبانی، سەرۆکی یەکێتیی نیشتمانیی کوردستان بۆ دروستکردنەوەی متمانە لە نێوان لایەنە سیاسییەکاندا لە پێناو سەقامگیریی زیاتر.
