لە شاری ھەولێر بافڵ تاڵەبانی، ھاوسەرۆکی یەکێتیی نیشتمانیی کوردستان چاویکەوت بە ستیڤن هیکی، باڵیۆزی بەریتانیا لە عێراق و جەیمس سۆرنتۆن، كونسوڵی گشتیی بەریتانیا لە هەرێمی كوردستان.
لە دیدارێکدا جەخت لە ھەماھەنگی و ھاریکاریی زیاتری نێوان ھەردوولا کرایەوە و پەرەپێدانی پەیوەندییەکانیش دووپاتکرایەوە بەشێوەیەک کە خزمەت بە بەرژەوەندییە باڵاکانی ھەرێمی كوردستان و جێگیریی سیاسی، ئابوری و ئارامیی زیاتر لە ناوچەکە بکات.
ھاوسەرۆکی یەکێتیی نیشتمانیی کوردستان رۆشنایی خستەسەر دوایین گۆڕانکارییە سیاسی، ئابوری و ئەمنییەکان و ھەڵوەستەی لەسەر کێشەکانی نێوان ھەولێر و بەغداد کرد و باسی لە ھەوڵەکانی یەکێتی کرد بۆ تێپەڕاندنی دۆخەکە و گەیشتن بە رێککەوتن لەسەر بنەمای دەستوور و بەرژەوەندیی ھاوبەش.
بۆ ئەوەش بافڵ تاڵەبانی ڕایگەیاند، “کاری لەپێشینەی یەکێتی دابینکردنی بودجە و قووتی ھەرێمی کوردستانە”، بۆ ئەوەش چەند دەرچەیەکی سیاسی و نیشتمانی بۆ رزگاربوون لەم قەیرانانە خستەڕوو.
ھەر لە دیدارەکەدا بە وردیی باس لە مەترسیی پاشماوەکانی تیرۆریستانی داعش لە چەند ناوچەیەکی عێراق کرا و جەخت لە ھەماھەنگی و ھاوکاریی زیاتر کرایەوە بۆ پاراستنی ئاسایش و ئارامیی زیاتر لە ناوچەکە.
