بەڕێوەبەری پسوڵەی خۆراکی هەڵەبجە، بەهۆی بوونی گرفتێک لە بانکی رافیدەین، پڕۆسەی تۆمارکردنی ناوی منداڵ لە سیستمی فۆڕمی ئەلیکترۆنیی خۆراک کەمێک سست بووە.
مەریوان هادی، بەڕێوەبەری پسوڵەی خۆراکی هەڵەبجە، بە تۆڕی میدیایی ئێستای راگەیاند، لە 14ی مانگی رابردووەوە، خزمەتگوزاریی زیادکردنی منداڵ لە فۆڕمی ئەلیکترۆنیی خۆراک زیادکراوە، بەڵام بەهۆی گرفتێک لە سیستمی پارەدان، کە لە بانکی رافیدەین کێشەکە دروستبووە و هۆکارەکەی زۆری گوشارە لەسەر بانکەکە، لە ئێستادا زۆربەی مامەڵەکان بە سەرکەوتویی ئەنجامنادرێن، لەم دۆخەشدا پێویستە بەکارهێنەر چەند کاتژمێرێک چاوەڕێبکات تاوەکو پڕۆسەکە بە سەرکەوتویی ئەنجامدەدرێت.
وتیشی، بەگوێرەی ئەو ئامارانەی لەبەردەستدان، لە ماوەی ئەم دوو هەفتەیەدا تا ئێستا زیاتر لە سێ هەزار و 500 داواکاری پێشکەشکراوە و زیاتر لە %90ی داواکارییەکان پەسەندکراون، ئەو داواکاریانەشی کە ماون کاریان لەسەر دەکەین، ئەگەر گرفتیان نەبوو پەسەنددەکرێن.
