رێکخراوی ئۆپێک داتاکانی بەرهەمهێنانی بۆ مانگی هەشتی ئەمساڵ بڵاوکردەوە، تێیدا عێراق دووەم بەرهەمهێنەری نەوتە لە رێکخراوەکەدا.
رێکخراوی ئۆپێک لە راپۆرتی مانگانەی خۆیدا بڵاویکردەوە، سعودییە لە پلەی یەکەم ماوەتەوە و پێگەی خۆی وەک گەورەترین بەرهەمهێنەری نەوت لە جیهان و لە رێکخراوەکەدا پاراستووە و، ئاستی بەرهەمهێنانی رۆژانەی وڵاتەکە خۆی دەدات لە نۆ ملیۆن و 709 هەزار بەرمیل نەوتی رۆژانە.
بەپێی راپۆرتەکە، عێراق لە پلەی دووەم دێت، رۆژانە چوار ملیۆن و 15 هەزار بەرمیل نەوت بەرهەمدەهێنێت، بەمەش عێراق وەک یەکێک لە کاریگەرترین ئەندامانی رێکخراوەکە و دابینکەرێکی مەزنی نەوت لە جیهاندا مایەوە و درێژە بە پێگەکەی دەدات.
هەر لە راپۆرتەکەدا ئاماژە بەوەکراوە، سەرەڕای ئەوەی جیاوازی هەیە لە بڕ و توانای بەرهەمهێنان لەنێوان وڵاتانی بەهەمهێن لە رێکخراوی ئۆپێکدا، بەڵام بەشی زۆری ئەندامەکان تا رادەیەکی زۆر سەقامگیری خۆیان لە بەرهەمهێناندا پاراستووە.
