وتەبێژی وەزارەتی دەرەوەی قەتەر رایگەیاند، سبەینی لوتکەی وڵاتانی عەرەبی و ئیسلامی لە دەوحەی پایتەختی قەتەر بەڕێوەدەچێت.
ماجد بن محەمەد ئەنساری، وتەبێژی وەزارەتی دەرەوەی قەتەر بە ئاژانسی هەواڵیی رەسمیی قەتەر راگەیاند، سبەینێ لوتکەی بەپەلەی وڵاتانی عەرەبی و ئیسلامی لە دەوحە بەڕێوەدەچێت.
وتیشی، بەڕێوەچوونی لوتکەکە بۆ رەتکردنەوەی هێرشەکانی ئیسرائیل و هاودەنگیی وڵاتانی بەشدارە لەگەڵ دەوحە.
ئاشکراشیکرد، سبەینێ لە کۆبوونەوەکەدا، تاوتوێی رەشنووسی بەیاننامەیەکی هاوبەش دەکرێت لەسەر هێرشەکانی ئیسرائیل بۆسەر خاکی وڵاتەکەیان، کە لەلایەن کۆبوونەوەی ئامادەکاریی وەزیرانی دەرەوەی وڵاتانی عەرەبی و ئیسلامییەوە پێشکەشکراوە.
بڕیاریشە سبەینێ، هەریەک لە محەمەد شیاع سودانی، سەرۆک وەزیرانی عێراق و مەسعود پزیشکیان، سەرۆک کۆماری ئێران و رەجەب تەیب ئەردۆغان، سەرۆک کۆماری تورکیا، بەشداری لە لوتکەکەدا بکەن.
