سەرچاوەیەك لە مەكتەبی راگەیاندن و هۆشیاریی یەكێتیی نیشتمانیی كوردستان رایدەگەیەنێت، سێ رۆژە میدیا رەسمی و ناڕەسمییەكانی پارتی بە ئیعاز و پلانی سەرووی خۆیان و بە دڵێكی رەشی پڕ لە قین، پەلاماری شاری سلێمانی و یەكێتی.
ئەو سەرچاوەیە ئەوەشی ئاشکراکرد، ئەو میدیایانەی پارتی هەواڵی ناڕاست و چەواشەكارانە بە ناوی سەرۆك و سەركردەكانی یەكێتی لەسەر رووداوەكەی لالەزار و پڕۆسەی چەسپاندنی یاسا بڵاودەكەنەوە.
دەشڵێت، “ئێمە بە میدیای پارتی و ئاغاكانیان دەڵێین، نەك سێ رۆژ، بەڵكو سێ هەزار شەو و رۆژی دیکە پەلاماری یەكێتی و سلێمانی بدەن، ناتوانن شكستی خۆتان و هێزەكانتان بەرامبەر خورشید هەركی و ناڕەزاییەكانی ئەو ناوچەیە داپۆشن”.
ئاماژە بەوەشدەکات، هەموو خەڵكی كوردستان ئەو راستییە دەزانن ئەم پەلامارەی ئێوە بۆ ئەوەیە شكستی خۆتان و هێزەکانتان و سووتانی هەمەر و جێهێشتنی چەک و راکردنتان بەرامبەر خورشید هەرکی، لە بیر خەڵک ببەنەوە؛ بەڵام دیسانەوە دووبارەی دەکەینەوە، سێ هەزار شەو و رۆژی دیکە ئەم دۆڕانەتان لەبیر خەڵکی کوردستان، هەولێر و هۆزی هەرکی، ناچێتەوە.
