دەزگای ئاسایشی هەرێم، تۆمەتبارێكی خراپ بەكارهێنانی ئامێرەكانی پەیوەندیكردنی دەستگیركرد، كە هەڕەشەی لە 50 ئافرەت و پیاو كردبوو.
بەپێی راگەیەندراوێكی دەزگای ئاسایشی هەرێم كە وێنەیەكی دەست تۆڕی میدیایی ئێستا كەوتووە و تێیدا هاتووە، 17ی مانگی رابردوو لەسەر سكاڵای هاوڵاتییان دوای بەدواداچوون و كۆكردنەوەی زانیاریی ورد، لەسەر چەند ئەكاونتێكی تۆڕە كۆمەڵایەتییەكان بەناوی سحر و جادووكردن پارەی لەچەندین هاوڵاتی وەرگرتووە و دواتریش هەڕەشەی بڵاوكردنەوەی وێنە و ڤیدیۆی لەئافرەتەكان كردبوو.
هەر لە راگەیەندراوەكەدا هاتووە، بەڕێوەبەرایەتیی ئاسایشی راپەڕین، لەسەر فەرمانی دادوەری دادگای لێكۆڵینەوەی ئاسایشی راپەڕین، توانیان شوێنی تۆمەتبار دەستنیشانبكەن و لەچالاكییەكەدا تۆمەتبارێك دەستگیربكەن كەماوەی دووساڵە بەناوی سحر و جادوو، بەمەبەستی بەدەستهێنانی پارە هەڕەشەی لەچەندین ئافرەت و پیاو كردووە.
ئەوەشخراوەتەڕوو، تۆمەتبار تەمەنی 25 ساڵە، دوای دەستگیركردنی لەلایەن بەڕێوەبەرایەتیی ئاسایشی راپەڕین دەست بەسەر سەرجەم ئەكاونت و بەڵگە وێنە و ڤیدیۆكانی گیرا.
ئاماژە بۆ ئەوەش كراوە، لە ئێستادا تۆمەتبار بەماددەی دوولە یاسای قەدەغەكردنی خراپ بەكارهێنانی ئامێرەكانی پەیوەندیكردن راگیراوە و لێكۆڵینەوە لە دۆسیەكەی بەردەوامە.
