د. هەڤاڵ ئەبوبەكر، پارێزگاری سلێمانی لە پەیامێكیدا دەڵێت، “چەكدانان، هەنگاوێكی گەورە و گرنگە، بە ئومێدی ئاشتییەكی شكۆمەندانە، زۆرجار لە چەندین ساڵی رابردوودا، وتومانە، دەوڵەتنەتەوەكانی ناوچەكە و هەژمووندار بەسەر كوردستانەوە، بەتایبەتی لە سەد ساڵی رابردوودا گەیشتوونەتە ئەو باوەڕ و بڕیارەی كە كوردیان بەچەك پێلەناونابرێت، ئەم كوردە وەك نەتەوەیەكی رەسەن هەتا هەوڵی پاكتاوكردنی بدەیت زۆرتر و بەهێزتردەبێت”.
دەشڵێت، “دەبێت ئێمەی كوردیش بگەینە ئەو باوەڕەی كە هەموو ماف و داوا و خواستەكانمان تەنها بە چەك بەدەستنایەن”.
راشیگەیاند، “زەمینەی گفتوگۆ و ئاشتی، لەم زەمانی جەنگە جیهانییە رانەگەیەندراوەدا بەهێزكردنی هێزی لۆژیك و كپكردنی چەكەكان و خاوكردنەوەی لۆژیكی هێز و دەرفەتی سەقامگیرییەكی ناوچەیی بەرەو چەسپاندنی ئاسایش و بووژانەوەی ئابوری و گەشەی كۆمەڵایەتیمان دەبات، ئەگەر بۆ یەكلاكردنەوەی دۆسییە نێودەوڵەتییەكان تا رادەیەكی كەم هێز بۆ ماوەی بەردەوامی و بوونی خودی هێزێك، ئاشتییەكی كاتی دروستبكات و بە لاوازبوون و نەمانی ئەو هێزە شەڕ لە هەناوی ئاشتییەكی بەزەبری هێز ڕاگیراودا بەرپابكاتەوە، ئەوا لەسەر ئاستە ناوخۆیی و ناوچەییەكاندا ئاشتی، هێزێكی جێگیری بەردەوام بە هەرێم و دەوڵەتەكان لە ناوەوە دەبەخشێت.
باسیلەوەشكرد، ئێستا كە هەموو كورد، لەگەڵ ئەوانی تردا لە گفتوگۆ و هەوڵ و هەنگاوی ئاشتیدایە پێویستە لە ناوخۆی خۆشیدا بە تایبەتی لە هەرێمی كوردستاندا گفتوگۆ و هەوڵ و هەنگاوی مكوڕانەی قبووڵكردنی یەكتر و ئاشتەوایی نیشتمانی و گشتی دەستپێبكات، بەرامبەرەكانمان هیچكات هێندەی ئێستا لاوازنەبوون، بەڵام ئەوەی وایكردووە وەك داری بی بەسەرماندا شۆڕببنەوە، دابڕان و ترازان و داڕزان و ناكۆكی و دووبەرەكیی و بێمتمانەیی و خۆپەسەندیی و فرەبەرەیی خۆمانە، هەر ئەو دەردە كوشندەیەی ناوخۆمانە و دۆخی دارایی و ئابوریی و ژیان و بژێویی خەڵك و ژینگەو سیستمی گشتیی هەڵتەكاندووە و یەككەون با نەكەون و درود بۆ قبووڵكردنی یەكترو گیانی بەرزی لێبوردەیی و ئاشتییەكی شكۆمەندانە.
