وەزارەتی گواستنەوە: لە سبەینێوە ئینتەرنێت دەوەستێت

وەزارەتی گواستنەوە و گەیاندنی هەرێم، رایگەیاند، سبەینێ ئینتەرنێت دەوەستێت.

وەزارەتی گواستنەوە و گەیاندنی هەرێم بڵاویکردەوە، بڕیارە سبەینێ تاقیکردنەوەکان دەستپێبکەنەوە بەو هۆیەوە لە کاتژمێر 6:30 خولەکی بەیانی تاوەکو کاتژمێر 7:45 خولەکی بەیانی ئینتەرنێت لە تەواوی هەرێمی کوردستان دەوەستێت.

دەشڵێت، ئەو شوێنانەی دیاریکراون کە پێویستە لە هەموو حاڵەتێکدا خزمەتگوزاریی ئینتەرنێتیان هەبێت، بریتین لە :
1- سەنتەری زانیاریی هەژماری من، لە گەڕەکی 32ی پارک.
2- سەرجەم ئامێرەکانی راکێشانی پارە (ATM).
3- سەرجەم بانکەکان.
4- فڕۆکەخانەکانی نێودەوڵەتیی هەولێر و سلێمانی.
5- داتا سەنتەری (پرۆژەی رووناکی) و (پێوەری زیرەک).

وەزارەتەکە دەڵێت، ئامانج لە بڕینی خزمەتگوزاریی ئینتەرنێت، ساڵانە لەسەر داوای فەرمیی وەزارەتی پەروەردەی حکومەتی هەرێمە بۆ رێگریکردن لە دیاردەی گزی یان هەر هەوڵێکی دیکەی نایاسایی لەکاتی بەڕێوەچوونی تاقیکردنەوەکاندا.