ئاسایشى سلێمانى دەستگیرکردنى تۆمەتبارێک رادەگەیەنێت و دەڵێت، لە چوارەم شەوى جەژندا بووەتە هۆکارى مەترسى بۆ سەر خێزانێک.
بەڕێوەبەرایەتیی ئاسایشی پارێزگای سلێمانی رایگەیاند، شەوی 9ى حوزەیران لە شەقامی بەختیاریی شاری سلێمانی، بەهۆکاری پێکدادانی دوو ئۆتۆمبێل گرژی و ئاڵۆزی لەنێوانیان دروست دەبێت و، تۆمەتباری رووداوەکە دەبێتە هۆکاری هەڕەشە و مەترسی بۆ سەر خێزانێک.
دەشڵێت، لەسەر ئەم رووداوە، ئاسایشی سلێمانی بە بڕیاری دادوەر، بەدواداچوون و لێکۆڵینەوەی ئەنجامدا و تۆمەتباری رووداوەکەیان بەناوی (ش.ر.ف.) دەستگیرکرد.
لەئێستادا تۆمەتبار بە ماددەی 434 لە یاسای سزادان راگیراوە و لێکۆڵینەوە لە دۆسیەکەی بەردەوامە، وەک ئەوەى لە راگەیەندراوەکەى ئاسایشدا هاتووە.
