سەركردەیەكی حەشدی شمەر، باس لەوە دەكات كە ئەمریكییەكان بە ویستی خۆیان لەڕێگەی كوردستان-ـەوە دێنە عێراق، بەبێ ئەوەی بەغداد ئاگای لێبێت.
ئەبوبەدر شمەری، سەركردە لە حەشدی شمەر كە سەر بە هێزەكانی حەشدی شەعبین و لە ناوچەی ڕەبیعەی خۆرئاوای موسڵ بڵاوبوونەتەوە، ڕایگەیاند، “ئەمریكییەكان، لەڕێگەی دەروازی سنووریی سمێلكاوە لە سوریاوە دێنە عێراق و هەرێمی كوردستان.”
وتیشی، “ئەمریكا ناوبەناو هێزەكانی لە سوریا و هەرێمی كوردستان دەگۆڕێت، هاتوچۆكردنیشیان لەڕێگەی سمێلكاوە دەبێت و لەوێوە دێنە هەرێمی كوردستان، بەبێ ئەوەی بەغداد ئاگاداربكەنەوە، تەنانەت هەندێك جار لەوێشەوە دەچنە بنكەی سەربازیی عەین ئەسەد لە ئەنبار.”
شمەری ئەوە بە پێشێلكردنی سەروەریی عێراق ئەژماردەكات و دەڵێت، “پێویستە هاتنەناوەوەی هێزی بیانی بۆ عێراق، بە ئاگاداریی حكومەتی فیدراڵی و لایەنە فەرمییەكان بێت.”
