شارەزایەکی بواری کەشناسی داوا لە هاوڵاتییان دەکات نەچنە شوێنی بەرز، ناوچەی شاخاوی و ژێر درەخت، بەهۆی ئەوەی “هەورەبروسکەی بەهێز” بەڕێوەیە.
شاڵاو هیدایەت، شارەزای بواری کەشناسی رایگەیاند، لەئێستادا باران و هەورەبروسکە داخڵی بەشێک لە ناوچەکان بوون و له کاتەکانی دواینیوەڕۆی ئەمڕۆ بەولاوە، کاریگەریی حاڵەتی دەریای سور و مەداری زیاتر دەگات، بەرفراوان دەبێت و ناوچەکان بەگشتی دەگرێتەوە.
دەشڵێت، بارانەکە لە ناوچەیەک بۆ ناوچەیەکی دیکە جیاوازه و لە هەندێک شوێن تەرزە دەبارێت و خێرایی با لەکاتی تاوەکاندا، زیاتر دەبێت، هەروەها کۆتایی بە خۆڵبارینیش دەهێنێت و پلەکانی گەرما دادەبەزن.
ئەو شارەزایەی بواری کەشناسی داواش لە هاوڵاتییان دەکات، “نەچنە ناوچەی بەرز و شاخاوی و ژێر درەخت، کە لە دەرەوەش بوون، تا دەکرێت لە شوێنی پارێزراو بمێننەوە و بچنە ناو ئۆتۆمبێلەوە، پێویستە شوانکارانیش ئەمڕۆ ئاژەڵەکانیان نەکەنە دەرەوە بۆ سەلامەتیی خۆیان و ئاژەڵەکانیان، چونکە هەورەبروسکەی بەهێز لەئارادایە، نزمن و لە زەوی دەدەن”.
شاڵاو هیدایەت ئەوەشیخستووەتەڕوو، کاریگەریی ئەو حاڵەتەی باران و هەورەبروسکەیە، سبەی بەرەبەیان بەگشتی کۆتاییدێت .
