وەزارەتى پیشەسازیی عێراق رایدەگەیەنێت، بەرهەمهێنانى پانێڵى وزەى خۆر لە ناوخۆى وڵات کێبڕێکى بەرهەمى هاوردەکراو دەکات لەڕووى کوالێتى و نرخەوە.
زوحا جبورى، وتەبێژى وەزارەتى پیشەسازى و کانزاکان رایگەیاند، کارگەى گشتیی زەوراى سەر بە وەزارەتەکەیان تایبەت بە دروستکردنى پانێڵى وزەى خۆر، کەلوپەل و تەکنەلۆجیاى نوێى تایبەت بە بوارى دروستکردنى پانێڵى وزەى خۆر بە توانا جۆراوجۆرەکان و، تەکنیک و کوالێتیی بەرز لەخۆدەگرێت.
وتیشى، “پانێڵە خۆرییەکان خزمەت بە سەرجەم جۆرەکانى وێستگەى خۆرى گەورە، بچوک، حکومى، پیشەسازى، بازرگانى و ماڵان دەکات”.
بەرهەمى کارگەکە پێداویستیی بازاڕى ناوخۆ پڕدەکاتەوە، دەشتوانرێت دەرگا بەڕووى بازاڕى وڵاتانى دراوسى و هەرێمایەتى بکرێتەوە بۆ سەرجەم پرۆژەکانى وزەى خۆر لە ئایندەدا، وتەبێژى وەزارەتەکە واى وت.
روونیشیکردەوە، دروستکردنى ئەو بەرهەمە لە ناوخۆدا بەشێوەیەکى راستەوخۆ دەبێتەهۆى کەمکردنەوەى تێچووى بەرهەمهێنان لە وزەى خۆر و تواناى هاوڵاتی لە بونیادنانى وێستگەى وزەى خۆر زیاددەکات، کێبڕکێى پانێڵە هاوردەکراوەکانیش دەکات لەڕووى نرخ و کوالێتییەوە.
