زێلێنسکی باری نائاسایی لە ئۆکرانیا درێژکردەوە

ڤۆلۆدیمیر زێلێنسکی، سەرۆکی ئۆکرانیا دوو پرۆژەیاسای پێشکەش بە پەرلەمان کرد بۆ درێژکردنەوەی باری نائاسایی وڵاتەکەی بۆ ماوەی 90 رۆژی دیکە.

زێلێنسکی ئەو دوو پرۆژەیاسایەی بەگوێرەی رەشنووسی یاسای ژمارە 13172 و 13173 پێشکەشکردووە، کە لە ماڵپەڕی پەرلەمانی ئۆکرانیا بڵاوکراونەتەوە، بەمپێیەش، باری نائاسایی لەو وڵاتە لە 9/5/2025، هەتاوەکو 6/8/2025 درێژدەکرێتەوە.

ئەمە پانزەهەمین جارە لەسەریەک، باری نائاسایی لە ئۆکرانیا نوێدەکرێتەوە لەدوای دەستپێکردنی ئۆپراسیۆنە سەربازییەکانی رووسیا لە ئۆکرانیا.

میدیا جیهانییەکان باسلەوەدەکەن، پەرلەمانی ئۆکرانیا لە هەفتەکانی داهاتوودا پرۆژەیاساکان پەسەنددەکات و بەمپێیەش، جارێکیتر هەڵبژاردنی سەرۆکایەتی لەو وڵاتە، دوادەخرێت.

جێی ئاماژە بۆ کردنە، باری نائاسایی لە ئۆکرانیا، دەبێتە هۆی سنووردارکردنی هاوڵاتییانی ئەو وڵاتە لەم چەند خاڵەی خوارەوە:

– گەشتکردن بۆ دەرەوەی وڵات و هاتوچۆکردن لە ناوخۆی وڵات.

– قەدەغەی هاتوچۆ و پشکنینی بەڵگەنامەکان.

– ئازادیی رادەربڕین و چالاکیی میدیایی.

– ئەنجامدانی هەڵبژاردن و ریفراندۆم.