کەشناسی: ئەمشەو بەفر دەبارێت

شارەزایەکی بواری کەشناسی رایدەگەیەنێت، ئەمشەو پێشبینیی بەفربارین لە سەنتەری قەزای پێنجوێن و ناوچە شاخاوییەکانی شاری سلێمانی دەکرێت.

ئاراس جەبار، شارەزای بواری کەشناسی رایگەیاند، لەئێستادا ناوەندی شەپۆلە ساردەکەی باکور گەیشتووەتە سەر ناوچەکانمان، بەھۆیەوە خێرایی با زۆر چالاکبووە لەگەڵ بوونی تەرزە، باران و هەورەبروسکە لە ھەندێک ناوچەی پارێزگای سلێمانی و ئیدارەی راپەرین.

دەشڵێت، لە کاتەکانی داھاتوو تا ئێوارەی ئەمڕۆ، ئەگەری بارانی باش و رێژە مامناوەند لە زۆربەی ناوچەکان دەبێت، لەگەڵ بەردەوام نزمبوونەوەی پلەی گەرمی و لە کاتەکانی شەویشدا، پێشبینیی بارینی بەفر دەکەین لە ناوچە شاخاوییەکان، سەنتەری قەزای پێنجوێن، ئەزمەڕ و گۆیژە.

ئاراس جەبار باسلەوەشدەکات، ئەمشەو بەگشتی لە بەرزیی هەزار و 200 مەتر لە ئاستی رووی دەریا، ئەگەری بارینی بەفر دەبێت و بەرەبەیانی سبەی چوارشەممەش، 16/4/2025 کۆتایی پێدێت.

هاوکات بەپێی پێشبینیی کەشناسیی هەرێمیش، کەشی ئەمڕۆ سێشەممە لە سەرجەم ناوچەکان هەور و باراناوى دەبێت و هەندێک کات لێزمەباران و ئەگەرى هەورەتریشقە و بارینى بەفر لەسەر لوتکەى شاخە بەرزە سنوورییەکان، کاریگەریى ئەم شەپۆلە لە شەودا کۆتاییدێت .

دەشڵێت، پلەی گەرمی بە (5-7) پلە بەراورد بە تۆمارەکانی دوێنێ نزمدەبێتەوە.

بەرزترین پلەی گەرمیی پێشبینیکراو:

هەولێر : 15  پلەی سیلیزی

سلێمانی : 17 پلەی سیلیزی

دهۆک : 12  پلەی سیلیزی

کەرکوک : 18 پلەی سیلیزی

زاخۆ  : 13 پلەی سیلیزی

هەڵەبجە : 16 پلەی سیلیزی

سۆران : 11 پلەی سیلیزی

حاجی ئۆمەران : 6 پلەی سیلیزی

گەرمیان :21 پلەی سیلیزی