نوسینگەی قوباد تاڵەبانی رایگەیاند، جێگری سەرۆك وەزیران بە یاوەری وەزیری ئاوەدانكردنەوە بەردی بناغەی پڕۆژەیەكی لە هەڵەبجە دانا.
نوسینگەی جێگری سەرۆكی ئەنجومەنی وەزیران لە راگەیەندراوێكدا بڵاویكردەوە، پردی تەنگی سەید محەمەد پڕۆژەیەكی ستراتیژییە لە ناوچەكەدا و پارێزگای هەڵەبجە و ئیدارەی گەرمیان پێكەوە دەبەستێتەوە و ئەمڕۆ لەلایەن قوباد تاڵەبانی و بەیاوەری دانا عەبدولكەریم بەردی بناغەكەی داندرا، ئەم پردە درێژییەكەی 600 مەتر دەبێت و بە گوژمەی نزیكەی 27 ملیارد دینار لەماوەی 900 رۆژدا جێبەجێدەكرێت.
ئاماژەی بەوەشكردووە، لەم سەردانەی جێگری سەرۆك وەزیراندا پڕۆژەی سایلۆی هەڵەبجە بەسەركرایەوە و خودی خۆی بە دواداچونی بۆ چۆنییەتی بەرەوپێشچونی كارەكانی پڕۆژەكەكرد.
سایلۆی هەڵەبجە یەكێكە لە پڕۆژە ستراتیژییەكانی پارێزگای هەڵەبجە و لە ساڵی 2024دا بەردی بناغەكەی داندراوە و بڕیارە لە ماوەی دوو ساڵدا تەواو بكرێت.
