بەپێى پێشبینییەکانى کەشناسى ئەمڕۆ و سبەینێ ئاسمان پەلەهەور دەبێت و لە رۆژى سێشەممەوە شەپۆلێکى باران روو لە ناوچەکە دەکات.
بەڕێوەبەرایەتیی گشتیی کەشناسى و بومەلەرزەزانیی هەرێم رایگەیاند، ئەمڕۆ ئاسمان ساماڵ و پەڵەهەور دەبێت و، پلەى گەرمى بە (1-2) پلەى سیلیزى بەرزدەبێتەوە بەراورد بە تۆمارکراوەکانى دوێنێ.
دەربارەى پێشبینییەکان سەبارەت بە کەشوهەواى سبەینێش دەڵێت، ئاسمان ساماڵ و پەڵەهەور دەبێت، لە کاتەکانى دواى نیوەڕۆ دەگۆڕێت بۆ نیمچە هەور. پلەى گەرمیش بەگشتى (2-1) پلە بەرزدەبێتەوە بەراورد بە تۆمارکراوەکانى ئەمڕۆ.
لاى خۆیەوە دەستەى کەشناسیی عێراق رایگەیاند، رۆژى سێشەممە هەور و باران لە ناوچەکانى رۆژئاواى عێراق دەستپێدەکات و رۆژى دواتریش سەرجەم ناوچەکانى دیکە دەگرێتەوە، کە رێژەى باران لەنێوان کەم و مامناوەندا دەبێت و، هەندێک کات هەورەبروسکەشى لەگەڵدا دەبێت.
هەر بەپێى پێشبینییەکانى کەشناسى ئەگەرى بەرزبوونەوەى تۆز لە هەندێک ناوچەدا لە رۆژانى کۆتایى ئەم هەفتەیەدا هەیە.
