وتەبێژی یەکێتى رایدەگەیەنێت، یەكێتی بژاردەی ئاشتی بۆ چارەسەركردنی كێشەكان هەڵدەبژێرێت و دەشڵێت، كۆبوونەوەی وەفدی دانوسانكاری یەكێتی و پارتی دەستپێدەكاتەوە.
سەعدی ئەحمەد پیرە، وتەبێژی یەكێتیی نیشتمانیی كوردستان لە لێدوانێكدا رایگەیاند، یەكێتی هەمیشە بژاردەی ئاشتی بۆ چارەسەركردنی كێشەكان هەڵدەبژێرێت نەوەك شەڕ و لەگەڵ “وەفدی ئیمڕاڵیش كۆدەبینەوە و ئێمە چارەسەری كێشەكان بە ئاشتی دەبینین”.
لەبارەی كۆبوونەوەی وەفدی دانووسانكاری یەكێتی و پارتیش پیرە ئاماژەی بەوەكرد، “كۆبوونەوەكان دەستپێدەكەنەوە و لەئێستاشدا هەوڵەكان بۆ پێكهێنانی كابینەی نوێ كاری لەسەر دەكرێت”.
وتەبێژی یەكێتی جەختی لەوەشكردەوە، “بەهیچ شێوەیەك یەكێتی رازی نابێت بەوەی شەش وەزارەت وەربگرێت و ئەوانی دیكەش رادەستی سەرۆك وەزیرانی هەرێم بكات، بەشێكی زۆری وەزارەتەكان دەبێت پۆست و بەڕێوەبردنەكانیان بناسێندرێن ئەوكات لەسەر پۆستەكان رێكبكەوین”.
ئەوەشی روونكردەوە، ” هیچ كاتێك بۆ كاتی دیارییكردنی پێكهێنانیی پەرلەمان و حكومەت نییە و ئەوەی گرنگە كاتەكە نییە بەڵكو حكومەت و پەرلەمانێكی كارایە نەك پێكهێنانی حكومەتێكی ئیفلیج و خێرا”.
