لیژنەی دارایی ئەنجومەنی نوێنەرانی عێراق ئاشکرایکرد، پێویستە حکومەتی هەرێم پابەندبێت بە هەناردەکردنی نەوت لە رێگای کۆمپانیای سۆمۆوە بۆ گەرەنتیکردنی شەفافیەت و هاوبەشی.
ئەمڕۆ لیژنەی دارایی لە ئەنجومەنی نوێنەرانی عێراق بۆ گفتوگۆکردن لەبارەی هەمواری یاسای بودجە کۆبووەوە و دواتر راگەیەندراوێکی بڵاوکردەوە کە تێیداب هاتووە، کۆبوونەوەکە بە مەبەستی گفتوگۆکردن بووە لەسەر هەمواری ماددەی 12 ی یاسای بودجە بەمەبەستی چارەسەرکردنی گرفتی هەژمارکردنی تێچووی بەرهەمهێنانی نەوتی هەرێم، وەک هەنگاوی یەکەم بۆ چارەسەری کێشە هەڵپەسێردراوەکانی هەرێم و بەغداد.
ئاماژەی بەوەشکرد، پێویستە حکومەتی هەرێم پابەندبێت بە هەناردەکردنی نەوت لە رێگای کۆمپانیای سۆمۆوە بۆ گەرەنتیکردنی شەفافیەت و هاوبەشی.
لیژنەکە داوایکردووە، بە زوویی خشتەی بودجە رەوانەی ئەنجومەنی نوێنەران بکرێت بە مەبەستی یەکلاکردنەوەی داهاتی نەوتی و سەرجەم شایستە نەدراوەکانی حکومەتی ناوەندی.
