وەزیری بەرگریی توركیا پاش كۆبوونەوی لەگەڵ بەرپرسانی عێراق لە بەغداد، شەوی ڕابردوو گەیشتە هەرێمی كوردستان و بڕیارە ئەمڕۆ لەگەڵ بەرپرسانی باڵای هەرێم كۆببێتەوە.
بەگوێرەی كارنامەی سەردانەكەی خلوسی ئاكار، وەزیری بەرگریی توركیا بۆ هەرێم، وەك ئاژانسی ئانادۆڵوی توركی بڵاویكردووەتەوە، بڕیارە ئەمڕۆ سێشەممە 19ی كانونی دووەم وەزیرە توركییەكە لە هەولێر چاوی بە هەریەك لە نێچیرڤان بارزانی، سەرۆكی هەرێم و مەسرور بارزانی، سەرۆكی حكومەت بكەوێت.
سەبارەت بە ناوەڕۆكی كۆبوونەوەكانی لەگەڵ بەرپرسانی هەرێم، ئاژانسە توركییەكە ئاشكرایكردووە، “بڕیارە خلوسی ئاکار لە کۆبوونەوەکانیدا لە هەولێر لەگەڵ بەرپرسانی باڵای هەرێم، تاووتوێی دۆخی سیاسی و ئەمنیی ناوچەکە و زیادکرنی هەماهەنگییەکان و پاراستنی سنوورەکانی نێوان هەرێمی کوردستان و تورکیا بكات”.
