وڵاتی چین بڕیاریدا بە قەدەغەكردنی هەناردەكردنی سێ جۆر كانزا كە بریتین لە گالیۆم، جێرمانیۆم، ئەنتیمۆم بۆ ویلایەتە یەكگرتووەكانی ئەمریكا، هۆكارەكەشی دەگەڕێنەوە بۆ بەكارهێنانی كانزاكان لە پیشەسازیی سەربازی و دروستكردنی تەقەمەنی.
رۆژی سێشەممە، وەزارەتی بازرگانیی چین، لە راگەیاندراوێكدا ئاماژەی بەوەدا كە هەناردەكردنی هەریەكە لە كانزاكانی گالیۆم و جێرمانیۆم و ئەنتیمۆم بۆ ویلایەتە یەكگرتووەكانی ئەمریكا رادەگرن و قەدەغەی دەكەن.
هاوكات، قەدەغەكردنەكە تەنها ویلایەتە یەكگرتووەكان دەگرێتەوە و هۆكارەكەشی دەگەڕێننەوە بۆ بەكارهێنانی كانزاكان لە پیشەسازیی سەربازی و دروستكردنی چەك و تەقەمەنی لەلایەن وڵاتەكەوە.
ئەمە لەكاتێكدایە، گرژی لە نێوان چین و ویلایەتە یەكگرتووەكاندا چەندین قۆناغی تێپەڕاندووە، هەردوو وڵاتیش لە رێگای سیاسەت و ئابورییەوە سزای جۆراوجۆر بەسەر یەكتردا دەسەپێنن، لە هەفتەی رابردووشدا دۆناڵد تڕەمپ هەڕەشەی زیادكردنی باجی لە چەند وڵاتێك كرد لە نێویشیاندا چین.
