لیژنەی باڵای ئەمنیی سلێمانی بڕیاریدا بە دەست بەسەرداگرتن و گرتنەبەری رێکاری یاسایی بەرامبەر هەر جۆرە سوارڕەوێکی نایاسایی.
دەقی بڕیارەكە:
ئاگادارییەک لە لیژنەی باڵای ئەمنی پارێزگای سلێمانی
بۆ ڕای گشتی
ئاشکرایە لەلای هەمووان کە لەئێستادا بوونی سوارڕەوی بێ سەرەتا و هەڵگری ژمارەی ساختە و جام رەش بەشێوەیەکی نایاسایی خەریکە دەبێتە دیاردەیەک لەسەر شەقامەکان کە بێگومان رەنگدانەوەی نەرێنی دروست دەکات لەسەر ناو و ناوبانگی هەرێمی کوردستان و شاری سلێمانی، بەدەر لەوەش لە رووی ئەمنی و یاسایی و تاوانکارییەوە کاریگەریی خراپ و لێکەوتەی مەترسیداری هەیە، لە چوارچێوەی ئەم راستییە لیژنەی باڵای ئەمنی پارێزگای سلێمانی بڕیاریدا بە:
1- دەست بەسەرداگرتن و گرتنەبەری رێکاری یاسایی بەرامبەر هەر جۆرە سوارڕەوێکی نایاسایی، (( بۆ خاوەنەکانیان هەیە کە بیبەنە دەرەوەی هەرێمی کوردستان)) وە سەرجەم بازگەکان دەستکراوە دەبن و رێگەنادەن دوای بڵاوکردنەوەی ئەم بڵاونامەیە لەژێر هیچ پاساو و بیانوویەک هیچ جۆرە سوارڕەوێکی بێ سەرەتا بێتە ناو شاری سلێمانی.
2- گرتنەبەری رێکاری یاسایی بەرامبەر هەر جۆرە سوارڕەوێک کە هەڵگری تابلۆی ساختە و نایاسایی بێت.
3- هیچ رێگەپێدان و نووسراوێک لەهەر لایەنێک جگە لە بەڵگەنامەی فەرمی و یاسایی کە لەلایەن بەڕێوەبەرایەتیی هاتوچۆوە دەرکراوە کاریان پێناکرێت.
4- جێبەجێکردنی ئەم بڵاونامەیە گوزارشت دەکرێت لە رۆژی بڵاوکردنەوەی، وە لە پێناو بەرژەوەندیی گشتی و سەپاندنی باری ئارامی و سەروەریی یاسا و نەهێشتنی هەموو دیاردە دزێوەکان، داواکارین لەم پرسەدا دەزگاکانی راگەیاندن هاوکارمان بن شان بە شانی ئەوانیش هاوڵاتییانی بەڕێز و خۆشەویست.
لیژنەی باڵای ئەمنی پارێزگای سلێمانی
2024/12/3
