ئەو ئۆتۆمبێلەی بە بکوژی ژنان ناودەبرا دەستی بەسەرداگیراو خاوەنەکەشی دەستگیرکرا.
لەنێو تۆڕە کۆمەڵایەتییەکان ڤیدیۆیەک بڵاوبووەوە کە وا باسی ئۆتۆمبێلێکی جۆری پیکاب دەکرا 22 جار فرۆشراوە و ئەو کەسانەی کڕیاری ئۆتۆمبێلەکەبوون هاوژینەکانیان گیانیان لەدەستداوە.
باس لە ئەوەش دەکرا لەبەر ئەو هۆکارە خاوەنی ئۆتۆمبێلەکە نرخەکەی بەرزکردووەتەوە.
بە بڕوای چالاکوانان، ئەوە بێڕێزییە بەرامبەر بە ژنان دەکرێت.
پەیامنێری تۆڕی میدیایی ئێستا لە هەولێر گواستییەوە، لەڕێگای داواکاری گشتییەوە ئەو کەیسە جوڵێندرا و فەرمانی دەستگیرکردن بۆ خاوەنی ئێستای ئۆتۆمبێلەکە دەرچوو، هەروەها دەستیش بەسەر ئۆتۆمبێلەکەدا گیرا.
