وەزیری ئاوەدانكردنەوەی هەرێم رایدەگەیەنێت، تەنها پابەندە بە بڕیاری جڤاتی هەڵبژێردراوی نیشتمانی بزووتنەوەی گۆڕان و بڕیاری هیچ كەسێكی دیكە بۆ كشانەوە لە حكومەت پەسەندناكات و دەشڵێت، “وەك وەزیر لە كارەكانم بەردەوامدەبم”.
دانا عەبدولكەریم، وەزیری ئاوەدانكردنەوە و نیشتەجێكردن رایگەیاند، لە كۆنگرەیەكی رۆژنامەوانیدا لە گردی زەرگەتەی شاری سلێمانی، رایگەیاند، هەمووان دەزانن لەسەرەتای ئەمساڵدا گۆڕان كۆنفرانسی نیشتمانی بەست و دواتر هەڵبژاردنی ناوخۆیی گۆڕان دەستیپێكرد كە راسپاردەی كۆنفرانس بوو دەبێت هەڵبژاردن بكرێت، ئێمە 26 مەكۆمان هەیە و هەڵبژاردن لەسەرجەمیان ئەنجامدرا و باژێرەڕەوان دانراوە، واتا باژێڕەوانەكان دیاریكراون، دواتر سێ كەس بەنوێنەرایەتیی رەوەندی دەرەوە هەڵبژێردراون و كەسێكیش كراوەتە نوێنەری ژنان، دوای ئەوەی سەرۆكی جڤاتی گشتی هەڵبژێردرا ئەندامی جڤاتی نیشتمانی بووە 31 كەس و بەپێی دەستووری گۆڕان مستەفا سەید قادر دەبێتە ئەندامی جڤاتی نیشتمانی و سەرجەمیان دەبنە 32 ئەندام.
دەشڵێت، جڤاتی نیشتمانی بزووتنەوەی گۆڕان هەر بڕیارێك بدات 100% پابەندم پێوەی و هیچ كەسێكی دیكە مافی بڕیاردانی نییە و وتیشی، “جڤاتی نیشتمانی بزووتنەوەی گۆڕان هەر بڕیارێك بدات 100% پابەندم پێوەی و هیچ كەسێكی دیكە مافی بڕیاردانی نییە لە رۆژی 9ی 10ی 2024 كۆبوونەوەیەك كراوە بەناوی جڤاتی نیشتمانییەوە كە ئەو برایانامان رێكیانخستووە و شوێنێكیان كردووە بە مەكۆ بۆ خۆیان، دوو بڕیاریانداوە هەردوو بڕیارەكەی ئەو رۆژە پووچەڵن و كاریان پێناكرێت”.
