ماوەی 24 کاتژمێر بەسەر بڵاوبوونەوەی هەواڵی کوژرانی حەسەن نەسڕوڵا ئەمینداریی گشتیی حزبوڵای لوبنان تێپەڕدەبێت، وێرای دۆزینەوەی تەرمەکەی هێشتا کات و شوێنی بەخاکسپاردنی ئاشکرانەکراوە.
ئەمڕۆ یەکشەممە ئاژانسی هەواڵی رۆیتەرز بڵاویکردەوە، تەرمی حەسەن نەسروڵا ژمارەیەک لە بەرپرسانی حزبەکەی لەژێر داروپەردووی ئەو باڵەخانەیەدا دۆزرانەوە کە لەلایەن ئیسرائیلەوە کرابووە ئامانج.
لەدوای دۆزینەوەی تەرمی ناوبراو کات و شوێنی بەخاکسپاردنی بووە جێگای باسی بەشێک لە میدیا عەرەبییەکان.
سەرچاوەیەکی ئاگادار لە حزبوڵاوە بڵاویکردەوە، ناوبراو لە زێدی خۆی لە ناوخۆی لوبنان بەخاکدەسپێردرێت و لە چەند کاتژمێری داهاتوودا کاتی بەخاکسپاردنەکەی ئاشکرادەکرێت.
حزبوڵا دەیەوێت بە رێورەسمێکی شایستە تەرمی ناوبراو بەخاکبسپێرێت و بەهۆی مەترسیی بۆردومانەکانی ئیسرائیلەوە تا ئێستا وادەکەی دیارینەکردووە.
لای خۆیانەوە میدیاکانی عێراق لە زاری گروپە شیعیەکانەوە بڵاویانکردەوە، داوا دەکرێت تەرمەکە بهێنرێتە عێراق و لە رێورەسمێکدا لە مەزاری ئیمام حسێن لە شاری کەربەلا بەخاکبسپێردرێت.
چاوەڕێدەکرێت لە چەند کاتژمێری داهاتوودا حزبوڵا بڕیاری یەکلاکەرەوە لەبارەی کات و شوێنی بەخاکسپاردنەکە بدات.
