كاریگەریی ئەم با بەهێزەی ئێستا كەی تەواو دەبێت؟

كەشناسیی هەرێم كاتی كەمبوونەوەی كاریگەری ئەو با بەهێزە ئاشكرادەكات كە چەند رۆژێكە رووی لە ناوچە جیاجیاكان كردووە.

بەڕێوەبەرایەتیی گشتیی كەشناسی و بومەلەرزەزانیی هەرێم رایگەیاند، ئەمڕۆ ئاسمان ساماڵ دەبێت، پلەی گەرمی نزمدەبێتەوە بە (1-2) پلە بەراورد بە تۆماركراوەكانی دوێنێ.

دەشڵێت، خێرایی با مامناوەند دەبێت، بە (10 – 25) كیلۆمەتر لە كاتژمێرێكدا، بەڵام لە ناوچەکانی سلێمانی، کەرکوک و گەرمیان چالاک دەبێت بۆ 30 کم/ک و لە کاتەکانی ئێوارەدا خێرایی با کەم دەبێتەوە.

دەربارەی كەشوهەوای سبەینێش بەپێی پێشبینییەكانی كەشناسیی هەرێم، ئاسمان ساماڵ دەبێت، پلەی گەرمی كەمێك بەرزدەبێتەوە بەراورد بە تۆماركراوەكانی ئەمڕۆ و خێرایی باش مامناوەند دەبێت بە (10 – 20 ) کم/ک.

هەر بەپێی پێشبینییەكان بەرزترین پلەی گەرمیی پێشبینیکراو بەمجۆرە دەبێت، (هەولێر 35 پلە، سلێمانی 30، دهۆک 36، کەرکوک 37، هەڵەبجە 34، زاخۆ 36، حاجی ئۆمەران 20، سۆران 31 و گەرمیان 38 پلە).