لێپرسراوی ئەنجومەنی پاراستنی بەرژەوەندییە باڵاكانی یەكێتیی رایدەگەیەنێت، گۆڕانکاریی ریشەیی لە هەرێم بووەتە پێویستییەکی قۆناغەکە و ئەو كارەش بە یەكێتی دەكرێت.
جەعفەر شێخ مستەفا، لێپرسراوی ئەنجومەنی پاراستنی بەرژەوەندییە باڵاكانی یەكێتیی نیشتمانیی كوردستان رایگەیاند، دەتوانین لەڕێی هەڵبژاردن و ناردنی نوێنەرانی دڵسۆز و راستەقینەی خەڵک بۆ پەرلەمان، بەشێوەیەکی ئاشتیانە شێوازی حوکمڕانی خۆمان بەرەو باشتر بگۆڕین، کە سەرەنجامەکەی حکومەتێکی خزمەتگوزاری ئەوتۆی لێبکەوێتەوە کە هاوڵاتییان لە مەینەتیی و بێ خزمەتگوزاریی رزگار بکات.
وتیشی، “گۆڕانکاریی ریشەیی لە هەرێم بووەتە پێویستییەکی قۆناغەکە و ئەوەش تەنها بە هێزێکی گەورە و بەرچاوڕوونی خاوەن روئیای ئایندەیی وەکو یەکێتی دەکرێت”.
ئەو وتانەی جەعفەر شێخ مستەفا ئەمڕۆ لە گوندی “باڕۆیی”ی ناوچەی قەرەداغ، لەمیانەی كۆبوونەوەیەكدا بوو لەگەڵ ژمارەیەک لە کەسوکاری شەهیدان و کەسایەتیی کۆمەڵایەتیی سنوورەکە.
لێپرسراوی ئەنجومەنی پاراستنی بەرژەوەندییە باڵاكانی یەكێتیی باسی لەوەشكرد، سەرۆک و سەرکردایەتیی یەکێتی شانازی بە کەسوکاری شەهیدانەوە دەکەن و هەرگیز فیداکاریی و قوربانیدانی دانیشتووانی ناوچەکانی بازیان و قەرەداغ بە گشتی و گوندی باڕۆیی بەتایبەتی لەیادناکەن و ئەوەی پێیان بکرێت بۆ خزمەتکردنیان درێغی ناکەن.
