لە شاری هەولێر لەسەر کارپێکردنی ئاوی بیر لەنێوان دوو خێزان شەڕ دروستبوو و بەهۆیەوە چەند کەسێک برینداربوون پۆلیسی هەولێریش لەسەر ئەو رووداوە دەستگیرکردنی چەند کەسێکی راگەیاند.
بەڕێوەبەرایەتیی پۆلیسی هەولێر بڵاویکردەوە، دوای ئەوەی لە کۆمەڵگای کاوە ی سەر بە قەزای قوشتەپە دەمەقاڵی و شەڕ لە نێوان دوو خێزاندا دروست بوو، دەستبەجێ هێزەکانمان دەستیان بە لێکۆڵینەوە کرد.
ئاشکراشیکرد، لە ئەنجامی لێکۆڵینەوەکان دەرکەوت کەوا ئەو دوو خانەوادەیە لەسەر کارپێکردنی بیری ئاو بووەتە دەمەقاڵییان و دواجار توندوتیژیی لێکەوتووەتەوە و بە چەقۆ و ساتوور یەکتریان زامدار کردووە.
باسیلەوەشکرد، لە شەڕەکەدا چەند کەسێک بریندار بوون، بۆیە لەلایەن تیمەکانمانەوە حەوت کەس بە تۆمەتی تێوەگلان لەو کێشەیە و بە بڕیاری دادوەری لێکۆڵینەوە دەستگیرکران، کە دووانیان برینەکەیان سەختە و لە ژێر چاودێریی ورد و چڕی پۆلیس و تیمە پزیشکییەکاندان.
