پێشڕەو مەلا وەیسی رۆژنامەنووس رایگەیاند، 31 ی ئابی 1996 خیانەتێكی نیشتمانی بوو، كە تا رۆژمێری مرۆڤایەتیی بەردەوام بێت برێنێكی ساڕێژ نەبووە و پەڵەیەكی رەشە بە ناوچەوانی بكەرانییەوە، ئەو حزبەی شانازی بە خیانەتەوە بكات نابێت و ناكرێت چاوەڕوانی كاری باشی نیشتیمانی و نەتەوەیی لێبكرێت.
ئەو رۆژنامەنووسە نووسیویەتی، 31 ی ئاب ئەو رۆژە شووم و هەڕاجكراوەی نیشتمانە كە پارتی پێشڕەوایەتی رژێمی رووخاوی كرد بۆ داگیركردنی هەولێر و داگرتنی ئاڵای پیرۆزی كوردستان لەسەر سەری پەرلەمانی بە خوێن بنیاتنراوی شەهیدان و شوێنگەی هیوای دایك و باوك و نەوەی شەهیدان داپۆشرا بە ئاڵا نەگریسەكەی رژێم و شكۆی میلەتی كورد بەگشتی خرایە هەڕاجی سیاسی ئەو حزبەی ئێستا بە شانازی دەزانێت.
دەشڵێت، هەرساڵ دەگەمە مانگی ئاب زیاتر خەم دامدەگرێت و ئەو ڕۆژانەم دێتەوە یاد و زیاتر لە زیاتر نەفرەت لە بكەرانی دەكەم و دەڵێم “خیانەكردن و پشتكردنە میلەت و نیشتمان لە بەردەم ئەو حزبەدا كراوەیە و تا ئێستاش بەردەوامە، ئەگەر سەیرێكی سنوورەكانی ژێر دەسەڵاتیان بكەیت دەبینیت كە چۆن دەستی نەیارەكانی گەلی كورد دەگرن بۆ لەناوبردنی هاوخوێن و هاوزمانەكانی خۆیان، بۆیە 31 ی ئاب خیانەتێكی نیشتیمانی و پەڵەیەكی ڕەشە لە میژووی بكەرەكەیدا.
جەختیشیکردووەتەوە، لە 31 ی ئابدا پارتی راستە خاكی بۆ داگیركرا، لەلایەن دوژمنی میلەتەكەمانەوە كە بە شانازی دەبینێت، بەڵام لەگەڵ شكاندنی شكۆی پەرلەمانی كوردستاندا، شكۆی سیاسی و سەربازی خۆی بۆ هەمیشە لای خەڵكە نیشتمانپەروەرەكان شكاند و راستكردنەوەشی ئەستەمە.
