وەزارەتی بازرگانیی عێراق گەیشتنی کاروانێکی نوێی برنجی تایلەندی بۆ بەندەری ئوم قەسر راگەیاند و دەڵێت، ”41 هەزار و 500 تۆنە و لە سەبەتەی خۆراکی مانگانەدا دەدرێت بە هاوڵاتییان”.
لە راگەیەندراوێکدا نووسینگەی راگەیاندنی وەزارەتی بازرگانیی عێراق ئاماژەی بەوە کردووە، ”کەشتیی MV BLUE RAY بە هەڵگرتنی 41 هەزار و 500 تۆن برنجی تایلەندی گەیشتە بەندەری ئوم قەسر و لە سەبەتەی خۆراکی مانگانەدا دەدرێت بە هاوڵاتییان”.
ئەوەشی خستووەتەڕوو، ”پشکنەران لە بەندەرەکە بە هاوکاری ستافی بەشی کۆنترۆڵی جۆری پشکنینی سەرەتاییان بۆ برنجەکە کرد و دواتر رەوانەی تاقیگەی ناوەندییان کرد بۆ ئەنجامدانی پشکنینی تاقیگەیی بۆ دڵنیابوون لە پابەندبوونیان بە تایبەتمەندییە عێراقییەکان”.
دەشڵێت، ”دوای گەڕانەوەی ئەنجامی پشکنینەکە، ئەو ماددە خۆراکییە بەسەر بەش و لقەکانی کۆمپانیاکاندا دابەشدەکرێت بەپێی ئەو پلانەی کە لەلایەن وەزارەتەوە ئامادەکراوە بەمەبەستی پێدانی بە هاوڵاتییان لەچوارچێوەی سەبەتەی خۆراکی مانگانەدا”.
