لە چەند رۆژی داهاتوودا، پلەی گەرمی ناوچە جیاوازەکانی هەرێمی کوردستان روو لەدابەزینێکی کەم دەکەن، دواتریش پێشوازیی لە کۆتا شەپۆلی بەرزبوونەوەی پلەی گەرمی لەمساڵدا دەکەین و وردەوردە بەرەو کەشی پایزە دەچین.
شاڵاو هیدایەت، شارەزای کەشناسی دەڵێت، “کۆتا شەپۆلی بەرزبوونەوەی پلەی گەرمی ئەمساڵ، لە رۆژی 20ی ئەم مانگەوە دەستپێدەکات کە هاوکاتە لەگەڵ رۆژی سێشەممەی داهاتوو و پاشان، بۆ ماوەی چەند رۆژێک بەردەوامی دەبێت و لەگەڵ کۆتاییهاتنی چلە، کاریگەرییەکەی لاوازدەبێتەوە”.
بە گوێرەی پێشبینییەکانی کەشناسەکە، لەسبەی شەممەوە تاوەکو 20ی ئەم مانگە و بەهۆی کشانەوەی ئەو تۆپەڵە هەوا گەرمییەی ماوەی چەند رۆژێک لەسەر ناوچەکانمان بوو، پلەی گەرمی لەسەرجەم ناوچەکان بەڕێژەی یەک تا سێ پلەی سیلیزی دادەبەزن لەناوچە شاخاوی و نیمچە شاخاویەکان و دوو تاوەکو سێ پلە لەناوچەکانی خۆرئاوا و ناوچەکانی دیکە یەک تا دوو پلەی سیلیزی.
لەبارەی کۆتاییهاتنی مانگی ئاب و چوونە ناو مانگی ئەیلولەوە دەڵێت، لەکۆتاییەکانی ئەم مانگەوە بەدواوە گۆڕانکاری گەورە روودەدات و قۆناغ بەقۆناغ کشانەوەی وەرزی هاوین دەستپێدەکات و بەم شێوەیه وەرزی هاوینی ئەمساڵ ماڵئاوایی دەکات.
