بومەلەرزەیەك بە گوڕی 6.1 پلە كەناراوەكانی رۆژهەڵاتی تایوانی هەژاند، وەك ئەوەی دەستەی رووپێوی جیۆلۆجی ئەمریكی بڵاویكردەوە.
بەپێی دەستەكە بومەلەرزەكە لە قوڵایی 15.4 كیلۆمەتر لە زەریای هێمن و لە كەناراوی شاری هوالین روویداوە.
لای خۆیەوە ئاژانسی كەشناسیی تایوان گوڕی بومەلەرزەكەی بە 6.3 پلە و لە قوڵایی 9.7 كیلۆمەتر دیاریكرد.
ئاژانسەكە لەڕێی ئاگاداركردنەوەی مۆبایلەوە داوای لە دانیشتووان كرد ئارام بن و بەشوێن پەناگەی نزیكدا بگەڕێن.
تایوان بەشێوەی بەردەوام رووبەڕووی بومەلەرزە دەبێتەوە بەهۆی شوێنەكەی لەنێوان دوو پلێتی تەکتۆنی، دوا بومەلەرزەی بەهێز دەگەڕێتەوە بۆ نیسانی رابردوو كاتێك بە گوڕی 7.4 پلە دوورگەكەی هەژاند و بەرپرسان رایانگەیاند بەهێزترینی 25 ساڵی رابردوو بووە.
