وەزارەتی سامانە سروشتییەکانی هەرێم رایدەگەیەنێت، بەپێی مەرج و رێنماییەکانی وەزارەت مۆڵەتی رەسمی تەنها بە سێ پاڵاوگە دراوە و ئامادەی هاوکاری و هەماهەنگین بۆ داخستنی پاڵاوگە نایاساییەکان.
لە روونکردنەوەیەکدا وەزارەتی سامانە سروشتییەكان ئاماژە بەوە دەکات، ”بێجگە لە هەر سێ پاڵاوگەی كار و لاناز و قەیوان مۆڵەتمان بە هیچ پاڵاوگەیەكی دیكە نەداوە، ئەوانیش بەپێی مەرج و رێنماییەكانی وەزارەت كار دەكەن”.
ئەوەشخراوەتەڕوو، ”پێدانی مۆڵەت بە پاڵاوگەکان لەرێگەی وەزارەت و پابەندبوون بە رێنماییەکان دەبێت، یەکێک لەوانە پێوەرەکانی پاراستنی ژینگەیە کە لایەنی ژینگەیی بەشی هەرە گرنگی رێنماییەكانە”.
دەشڵێت، ”بۆ پاراستنی ژینگەی کوردستان بە نووسراوی رەسمی پارێزگاكان و ئیدارە سەربەخۆكانی ئاگادارکراونەتەوە پێویستە رێکاری یاسایی بۆ پابەندکردنی موەلیدەكانی كارەبا و بەكارهێنانی گازی كوالێتی باش بە پێی خەسڵەتەكانی پەسەندكراوی وەزارەت بگیرێتەبەر، هەروەها بۆ رێگریکردن لە ساغكردنەوەی بەرهەمی نایاسایی و خراپی پاڵاوگەكانیش داوا لە پارێزگا و ئیدارە سەربەخۆكان کراوە تاقیگە نایاساییەکان دابخەن”.
لە کۆتاییدا ئەو وەزارەتە جەختلەوە دەکاتەوە، ”وەزارەتی سامانە سروشتییەكان بۆ داخستنی سەرجەم پاڵاوگە نایاساییەکان ئامادەی هەماهەنگی و هاوکاریکردنی پارێزگا و ئیدارە سەربەخۆکانە”.
