ئەنجومەنی نوێنەرانی عێراق ئەمڕۆ شەممە کۆبوونەوەی ئاسایی خۆی ئەنجامدەدات لە کاتژمێر یەکی دوای نیوەڕۆدا بەگوێرەی نوسینگەی راگەیاندنەکەی و تاوتوێی سێ پرس دەکات.
بە گوێرەی راگەیەندراوی نوسینگەی ئەنجومەنی نوێنەرانی عێراق، ئەمڕۆ دانیشتنی ژمارەی چواری وەرزی دووەمی یاسادانان، بەڕێوەدەچێت.
بابەتی یەکەمی دانیشتنەکە، خوێندنەوەی یەکەمە بۆ یاسای بڕیاردان و بە بەشداری لیژنەکانی یاسایی و وەبەرهێنان و گەشەسەندن و لیژنی دارایی دەبێت.
لە بابەتی دووەمدا، راپۆرتی پڕۆژەیاسای بەدەستهێنانی زانیاری پێشکەشدەکرێت و گفتوگۆی دووەمی دەکرێت بە بەشداری لیژنەی رۆشنبیری و گەشتوگوزار و شوێنەوار و میدیا.
بابەتی سێهەمیش خۆی دەبینێتەوە لە، پڕۆژەیاسای چاکسازی سێهەم لە یاسای قەرەبووکردنەوەی ئەو زیانلێکەوتووانەی ئەندامێکی جەستەیان لەدەستداوە لە میانەی هەر چالاکییەکی رژێمی لەناوچووی عێراق ژمارە 5ی ساڵی 2009 راپۆرتەکان پێشکەشدەکرێن و خوێندنەوەی دووەمی بۆ دەکرێت بە بەشداری لیژنەی شەهیدان و زیانلێکەوتووان و زیندانیانی سیاسی.
