لەگەڵ نزیکبوونەوە لە وادەی هەڵبژاردنی سەرۆکایەتیی وڵاتەکە، لە ئەمریکا یەکەمین دیبەتی دوو کاندیدی سەرەکی هەڵبژاردنەکە کە لە هەریەکە لە جۆ بایدن کاندیدی دیموکراتەکان و دۆناڵد ترەمپ کاندیدی کۆمارییەکان پێکهاتبوون بەڕێوەچوو.
بۆ یەکەمجار دیبەیتی کاندیدانی سەرۆکایەتیی ئەمریکا لەلایەن دەزگایەکی میدیاییەوە سازکرابوو و ماوەی 90 خولەکی خایاند.
لە دیبەیتەکەدا کە سەرەتا بە شێر و خەت دەستیپێکرد، هەردوو کاندید دەیانویست بە تۆمەتبارکردنی لایەنی بەرامبەر خاڵەکانیان لە راپرسییەکانی پێش هەڵبژاردن زیادبکەن.
لە دیبەیتەکەدا چەندین پرسی وەک کۆچی نایاسایی، منداڵ لەباربردن، دۆسیەی رەشپیستەکان، شەڕی تیرۆر و چەندین دۆسیەی دیکە گفتوگۆیان لەبارەوە کرا.
لای خۆیەوە دۆناڵد ترەمپ بایدنی رکابەری بە سەرۆکێکی لاواز و هۆکاری دروستبوونی چەندین قەیران و گرفت لە وڵاتەکە و جیهان تۆمەتبارکرد، لە بەرامبەردا بایدنیش ترەمپی بە خراپترین سەرۆک لە مێژووی وڵاتەکەیدا وەسفکرد.
بەپێی ئەو زانیاریانەی لە میدیاکانی ئەمریکا بڵاوکراوەتەوە، ئەنجامی دیبەیتەکە دیموکراتەکانی نیگەران کردووە و لە ئەنجامەکانی بایدن ناڕازیبوون، بەهۆی ئەوەی دەوترێت لە سەرەتای دیبەیتەکەدا ترس و دڵەڕاوکێ زاڵبووە بەسەر وەڵامەکانیدا.
