سەرۆکی کۆمسیۆنی ئەوروپا رایگەیاند، پاڵپشتی رکابەرییەکی دادپەروەرانە لەگەڵ چین دەکەین و ئێستا چین بەرهەمهێنێکی گەورەیە.
ئۆرسولا ڤۆن دێرلاین، سەرۆکی کۆمسیۆنی ئەوروپا چەند کاتژمێرێک پێش کۆبوونەوە سێ قۆڵییەکەیان لەگەڵ شی جینپینگ، سەرۆکی چین و ئیمانوێل ماکرۆن، سەرۆکی فەڕەنسا ئەوەی خستەڕوو، ” دەبێت هەنگاو بنێین بۆ ئەوەی دڵنیابین لەوەی کە کێبڕکێیەکی بازرگانیی دادپەروەرانە ئەنجامدەدرێت و بازار ناشێوێندرێت”.
ئاماژەی بەوەشکرد، “بەهۆی دابەزینی خواستی ناوخۆیی، ئێستا چین بەهۆی پاڵپشتییەکی گەورەوە بەرهەمی زیاتر بەرهەمدەهێنێت بەراورد بەوەی دەیفرۆشێت و دەبێتە هۆی زیادبوونی دابینکردنی بەرهەمە چینییە پاڵپشتکراوەکان، وەک ئۆتۆمبێلی کارەبایی و پۆڵا، ئەوەش بازرگانییەکی نادادپەروەرانەیە”.
دەشڵێت، ”ئەوروپا ناتوانێت ئەو شێوەیە لە بازرگانی قبوڵ بکات کە بازاڕ دەشێوێنێت و دەبێتە هۆی دابەزینی پیشەسازی لە ئەوروپا، هەروەها دەبێت ئەو ناهاوسەنگییە لە بازاڕدا چارەسەر بکرێت”.
