شارەزایەکی بواری کەشناسی عێراقی پێشبینی باران بارین دەکات لە چەند رۆژی داهاتوودا و دەڵێت، “لە سبەینێوە پلەی گەرمی دادەبەزێت و باران لە سنووری چەند پارێزگایەکی عێراق و هەرێمی کوردستان دەبارێت.”
سادق عەتیە، یەکێکە لە کەشناسە بە ئەزموونەکانی عێراق و بەردەوام پێشبینییەکانی جێگەی باسی میدیا عێراقییەکانن و لەدوا پێشبینیدا دەڵێت، لە چەند رۆژی داهاتوودا پلەکانی گەرمی لە پارێزگاکانی عێراق و هەرێمی کوردستان نزمدەبنەوە.
کەشناسەکە ئاماژەی بەوەداوە، سبەی شەممە کەشوهەوا لە باکووری وڵات کە مەبەستی لێی ناوچەکانی هەرێمی کوردستانە لە رۆژدا نیمچە هەور دەبێت و وردە وردە بەرەو ناوچەکانی دیکە درێژدەبێتەوە.
ئاماژەی بەوەشکردووە، رۆژی شەممە بارانبارین پارێزگاکانی نەینەوا، ئەنبار، دهۆک، سەڵاحەدین، هەولێر، کەرکوک دەگرێتەوە و رۆژی یەکشەممە، هەموو پارێزگاکان دەگرێتەوە.
دەستەی کەشناسیی عێراقیش لای خۆیەوە بڵاویکردەوە، بارانبارین رۆژی شەممە دەست پێدەکات و بەردەوامی دەبێت تا رۆژی چوارشەممەش لەناوچەکانی هەرێمی کوردستان.
