عەتوان عەتوانی، سەرۆکی لیژنەی دارایی پەرلەمانی عێراق رایگەیاند، دابینکردنی مووچە لە بودجەی ساڵی 2024 دا زامنکراوە و هیچ قەیرانێکی دارایی لە عێراقدا نییە.
سەرۆکی لیژنەی دارایی پەرلەمانی عێراق لە لێدوانێکیدا بە ئاژانسی هەواڵی عێراقی راگەیاندووە، “لیژنەکەمان چاوەڕوانی گەیشتنی خشتەکانی بودجەی گشتی ئەمساڵە بە پەرلەمان لەلایەن حکومەتەوە بەمەبەستی پەسەندکردن و جێبەجێ کردنی پلانەکانی پەرەپێدان و خزمەتگوزاری لە کەرتە جیاوازەکاندا”.
دەشڵێت، “هەموولایەک دڵنیا دەکەینەوە کە مووچەی فەرمانبەران و خانەنشینان و تۆڕی پاراستنی کۆمەڵایەتی بەتەواوەتی لە بودجەی ساڵی 2024دا زامنکراوە و هیچ قەیرانێکی دارایی له وڵاته‌دا بوونی نییە”.
