ئەندامێكی ئەنجومەنی نوێنەرانی عێراق رایدەگەیەنێت، بڕیاری حكومەتی عێراق هەیە تا یاسای بودجە هەمواردەكرێتەوە پارە بۆ مووچەی مووچەخۆرانی هەرێم رەوانەبكرێت و دەشڵێت، “بۆ مانگی شوبات پێویستە لەگەڵ وەزارەتەكانی عێراقدا پارەی تەرخانكراو رەوانەبكرێت ئەگەر دوابخرێت دەبێت فراكسیۆنە كوردییەكان هەڵوێستی جددییان هەبێت”.
كاروان یاروەیس ئەندامی ئەنجومەنی نوێنەرانی عێراق لە لێدوانێكیدا رایگەیاند، بڕیاری ئەنجومەنی وەزیرانی عێراق هەیە و چەند جارێكیش محەمەد شیاع سودانی سەرۆك وەزیرانی عێراق جەختیكردووەتەوە تا ئەو كاتەی یاسای بودجە هەمواردەكرێتەوە پارەی تەرخانكراو بۆ مووچەی مووچەخۆرانی هەرێم رەوانەدەكرێت، بۆ مووچەی مانگی یەك بە بیانووی نەبوونی پارەی نەختینەوە ناردنی 618 ملیار دینارەكە چەند رۆژێك دواخرا.
وتیشی، “بۆ ئەم مانگە دەبێت لەگەڵ پارەداركردنی وەزارەتەكاندا مووچەی مووچەخۆرانی هەرێم رەوانەبكرێت و ئەگەر نەنێردرا دەبێت فراكسیۆنە كوردییەكان هەڵوێستی جددیان هەبێت و بایكۆتی كۆبوونەوەكانی ئەنجومەنی نوێنەرانی عێراق بكەن و داوابكەن مووچەی مووچەخۆران مانگانە لە كاتی خۆیدا رەوانەبكرێت.
