پۆلیسی زاخۆ دەستگیركردنی دوو تۆمەتبار رادەگەیەنێت و دەڵێت، یەكێكیان لە مانگێكدا هەشت دزی ئەنجامداوە و ئەوی دیكەش لە مزگەوت دزی لە نوێژخوێنان كردووە.
ئەحمەد رەمەزان، وتەبێژی پۆلیسی زاخۆ لە تۆمارێكی ڤیدیۆییدا رایگەیاند، لەلایەن هێزەكانیانەوە تۆمەتبارێك بە تۆمەتی دزیكردن لە دووكانێكی مۆبایل و كاتژمێری زیرەك دەستگیركرا.
ئەوەشی وت، دوای لێكۆڵینەوە تۆمەتبار دانیبەوەدانا كە لەماوەی مانگێكدا هەشت دزی لەوجۆرەی ئەنجامداوە.
هەر لەلایەن هێزەكانی پۆلیسەوە تۆمەتبارێك دەستگیركرا، كە بە وتەی ئەحمەد رەمەزان خەڵكی توركیایە و لە مزگەوتەكانی سنوورەكەدا دزی لە نوێژخوێنان كردووە و گیرفانیانی بڕیوە.
تۆمەتباران بەرامبەر دادوەر دانیان بە ئەنجامدانی تاوانەكانیاندا ناوە و بەپێی ماددەكانی 443 و 444 لە یاسای سزادانی عێراقی راگیراون.
