فشارەکان لەسەر ئیدارەی بایدن لەناوخۆی ئەمریکا زیادیانکردووە، ئەوەش دوای ئەوەی سێ سەربازی وڵاتەکەی لە سنوری ئوردن سوریا لە هێرشێکی درۆنیدا کوژران، ئەمڕۆش وتەبێژی ئاسایشی نیشتیمانیی ئەمریکا رایگەیاند، وەڵامی هێرشەکە دەدەینەوە، بەڵام جەنگمان لەگەڵ ئێران ناوێت.
ئەمڕۆ دووشەممە، جۆن کێربی وتەبێژی ئاسایشی نیشتمانیی ئەمریکا رایگەیاند، ئیدارەی سەرۆک جۆ بایدن کە پێشتر هێرشەکەی بە پاڵپشتیکراوی ئێران ناوبرد لە ئێستادا لێکۆڵینەوە لە بژاردە بەردەستەکان دەکات بۆ وەڵامدانەوە.
دووپاتیشی کردەوە، وەڵامی هێرشەکان دەبێت وەک ئەوەی جۆو بایدن باسی کرد و وەڵامەکەش بەگوێرەی پێویست و گونجاو دەبێت.
بایدن کەوتووەتە ژێر فشاری توندی کۆمارییەکان، لە کاتێکدا ئەمریکا ئامادەکاری دەکات بۆ هەڵبژاردنەکان، ترەم هێرشی توند دەکاتە سەر بایدن و بە سەرۆکێکی لاواز ناوی دەبات.
