سیستمی بەرگریی لەش رۆڵێكی گرنگی هەیە لە پارێزگاریكردن لە تەندروستیی مرۆڤ، چونكە دابەزینی پلەكانی گەرما لە زستاندا و، ڤایرۆسەكان دەشێت كاریگەریی نەرێنی لەسەر جەستە دروستبكەن.
ئەنجلینا ڤۆدولازكایا-ی شارەزای خۆراك دەڵێت، لەكاتی بەدەستنەهێنانی بڕی پێویستی تیشكی سەروو وەنەوشەیی، پێست دەوەستێت لە بەرهەمهێنانی ڤیتامین D3، کە میتاپۆلیزمی چەوری رێکدەخات و، یارمەتیدەرە لە پاراستنی کێشی ئاسایی، هەروەها تەندروستیی پێست، قژ و نینۆکەکان زامن دەكات.
ئەو پزیشكە ژمارەیەك بەروبوومی خۆراكی دیاریكرد كە پاڵپشتیی تەندروستیی مرۆڤ و دۆخی دەروونی دەكات، تەنانەت لە وەرزە ساردەكاندا و دەڵێت، “سەوزەكان سەرچاوەی سەرەكیی ریشاڵە خۆراكییەكانن، كە بەهۆیەوە كۆلیستڕۆل لە جەستە دەردەدرێت و ئەركەكانی كۆئەندامی هەرس رێكدەخرێت. یەكێك لەو سەوزانە سپێناخ-ە. كە سەرچاوەی ڤیتامین Cیە، هەروەك بیتا كارۆتین و دژە ئۆكسانی تیایە كە هاریكاریی بەهێزكردنی سیستمی بەرگری دەدات”.
دەشڵێت، “سیر تایبەتمەندیی بەهێزی دژە ڤایرۆس و دژە بەكتریای تیایە. دەبێتە هۆی كەمكردنەوەی تووشبوون بە ئەنفلۆنزا و پەتا و، سیستمی بەرگری بەهێزدەكات. هەروەها زەنجەبیل تایبەتمەندیی دژە هەوكردنی تیایە، ئاستی كۆلیسترۆڵ دادەبەزێنێت و مرۆڤ لە نەخۆشییەكانی دڵ و دەمارەكان دەپارێزێت. لەگەڵ ئەوەشدا سوودبەخشە بۆ مێشك، یادگە و تەركیز باشدەكات و، رێگرە لە تووشبوون بە زەهایمەر”.
ئەو پسپۆڕە ئاماژەشدەدات، بۆ بەدەستهێنانی سەرجەم سەرچاوە خۆراكییە پێویستەكان بۆ باشكردنی تەندروستی و بەهێزكردنی سیستمی بەرگریی لەش لە وەرزی زستاندا زۆر پێویستە ئەو بەرهەمانە لەناو سیستمێكی خۆراكیی جۆراوجۆر و هاوسەنگدا بخورێت.
